BLOG

REMEMBRANZA D’UN CINE D’OTRU TIEMPU

Monumentu al Cine Royalty en Figareo (Mieres)
Monumentu al Cine Royalty en Figareo (Mieres)

En 1933 mio güelu Humberto y el so sociu llograben la llicencia municipal  de construcción del Cine Royalty, en Figareo.  El proyectu y dirección d’obres encargóse a los afamaos arquitectos de Xixón Manuel y Juan M. Del Busto, que cuntaríen con un presupuestu de 25.000 pesetes. Dende 1934, y mientres dalgo más de cuatro décades, esta sala diba acoyer a los referentes fílmicos de varies xeneraciones d’habitantes de la parroquia figaredense y del Valle de Turón. LLEER Y VER MÁS

‘MAMÁ’, FILME DE TERROR QU’ENTAMÓ EN 2008 COMO CURTIUMETRAXE

Apadrinaos por Guillermo del Toro, los bonaerenses  Andy y Barbara Muschietti entren de toes toes no meyor del Cine de Terror con Mamá, un thriller sobrenatural que provoca mieu, pero que tamién toca la freba sentimental de los espectadores.  Protagonizáu por Jessica Chastain y Nikolaj Coster-Waldaul allúgase con aciertu na medrana primitiva a la escuridá y … Sigui lleendo ‘MAMÁ’, FILME DE TERROR QU’ENTAMÓ EN 2008 COMO CURTIUMETRAXE

“NEVER EXTINGUISH”, D’ASH BOLLAN

El neozelandés Ash Bollan ye’l director d’esta entrega de la gallardonada serie de Coke Burn. Filmada en cais de Buenos Aires, el curtimetraxe narra un viaxe que na parte final suxier un llugar siniestru y una presencia cuasi sobrenatural.  Never extinguish ta protagonizáu por Runa Glifberg, Hamard Dany, Hugo Maillard y Skroder Jonas. VER MÁS

喜多川 歌麿 / KITAGAWA UTAMARO

Portada con un parcial de la estampa
Portada con un parcial de la estampa “Amantes”

Kitagawa Utamaro (喜多川 歌麿) foi un afamáu pintor d’estampes nipón, consideráu unu de los meyores artistes de los grabaos ukiyo-e. Nacíu en 1753 y muertu en 1806, ye conocíu poles sos maxistrales composiciones de muyeres, asina como polos estudios de naturaleza y los trabayos de conteníu eróticu.

La so obra fízose mui popular n’Europa metanes del sieglu XIX, influenciando a los impresionistes nel usu de vistes parciales y na combinación de lluces y solombres.

Yá no más particular, Kitagawa Utamaro resúltame bien cercanu. La portada del mio llibru de relatos ‘verderones’, Anatomíes de la mañana (VTP, 1995), reproduz una parte de la obra Amantes d’esti maestru xaponés.

VER MÁS

OTRA POESÍA N’ASTURIANU: LOLA KOUNDAKJIAN

Lola Koundakjian
Lola Koundakjian

Lola Koundakjian (Լօլա Գունտաքճեան n’armeniu) nació en Beirut, Líbanu, y lleva viviendo dende 1979 en Nueva York. Poeta, traductora, artista plástica y periodista, llicencióse en Belles Artes nel Hunter College. En 1982 entamó a trabayar la cerámica, afayándose obres d’ella en delles colecciones privaes de los Estaos Xuníos y Canada, tando representada anguaño pola Gallery Z en Providence, Rhode Island.

lolal

Nieta de cuatro sobrevivientes del xenocidiu armeniu, escribre sobre’l so patrimoniu cultural, la vida urbano y sobre les lluches de xente de tol mundu. Ye miembru del conseyu editorial d’Ararat, una revista lliteraria trimestral armenio-americana. Freelance pal Armenian Reporter, Armenian International Magazine y Armenia Weekly, periódicos toos ellos n’EEXX.

La so poesía apaez vía internet en GROONG (Universidá del Sur de California), ya impresa nel Armenian Weekly (Boston) y en Pakin (Beirut). El so llibru, The Accidental Observer, y escritu en trés llingües, armeniu, español ya inglés, espublizóse en 2011 con una beca de Northern Manhattan Arts Alliance.  LLER MÁS