Sean Cheetham nació en San Francisco, nel añu 1977. Esti artista californianu estudió nel College of San Mateo y graduóse con honores nel Art Center College of Design de Pasadena. Les sos obres afáyense incluyíes n’esposiciones a nivel internacional. Podemos tener una visión de la so trayeutoria na información que facilita la Katherine Cone Gallery.
La so pintura parte de la téunica clásica pa fundise pelos caminos del vanguardismu más pegáu a les referencies históriques de la creación underground. Sean Cheetham pinta, con un xeitu bien definíu, al mundu y a la xente que lu arrodia, exerciendo les pautes d’una capacidá esceicional pa entender y espeyar nel llienzu la forma humana, y pa ello plasma davezu les enseñances del so profesor y amigu nel Art Center College of Design, Mike Hussar.
Prefier definir al so dibuxu como llinial y non tonal, fuxendo nel prinicipiu de la obra del escesu de detalle pa, como él mesmu diz, “pintar unos pocos detalles escuros cola mezclienda más escuro-negro con más carmín d’alizarina nos párpagos, na ñariz, nos llabios y les oreyes, y asina poder entós bloquiar con una mezclienda de gris neutro de cobaltu azul y siena tostao“.
Na so web podemos topar una amuesa bien curiosa de los llogros d’esti pintor. D’ente ello allugamos equí los componentes de la galería siguiente:
