En 1933 mio güelu Humberto y el so sociu llograben la llicencia municipal de construcción del Cine Royalty, en Figareo. El proyectu y dirección d’obres encargóse a los afamaos arquitectos de Xixón Manuel y Juan M. Del Busto, que cuntaríen con un presupuestu de 25.000 pesetes. Dende 1934, y mientres dalgo más de cuatro décades, esta sala diba acoyer a los referentes fílmicos de varies xeneraciones d’habitantes de la parroquia figaredense y del Valle de Turón.
El Cine Royalty foi’l llugar onde cientos de películes acabaríen por definir el mio inclín p’hacia la pasión cinematográfica. Remembrándolu escribí un poema en prosa d’igual nome, espublizáu en 1993 nun llibrín d’Ámbitu, y que apaez tamién nel poemariu Les esferes del tiempu, espublizáu por Trabe en 1998. Cópiolu abaxo y acompáñolu con una galería de semeyes y documentos venceyaos a esti cine esencial na mio vida.
CINE ROYALTY
Nel abellu la escuridá les imáxenes semaben un cronometráu silenciu. Xurdía la calor del trópicu, anque na caye l´inviernu barbuzaba. Per aciu de fotogrames mazuñaos dalguién contruyía milenta ficciones. La lluz yá sumía minutos infantiles nos enfallos d´un Tarzán faedor de biecos en blanco y negro.
